قصيدة من كلمات الشاعر والفارس الشيخ/جهز بن شرار الميموني المطيري
يالله ياللي عالمن بالخفيه ** يا والي الأشياء بتدبير الزين
وحمدت ربي زين العلم ليه ** ومن غير تدبيره ما حنا مسويين
وخلاف ذا يا راكب عدمليه ** منوة مودين الخبار المعنين
سلم على إبن عقاب زبن الونيه ** ضيف الله اللي يحتمي خربة القين
عميلنا اللي نسنحه بالغزيه ** وهو من أول ما نويناه بالشين
يقص جرتنا بقومن رويه ** مرهن على أخذتنا وحنا معيين
بأمر الولي والعزوه العبدليه ** وربعن على الصكات والهوش ضارين
تضحي حرابتنا لسبع اللفيه ** حتى بني عثمان جمع السلاطين
يوم إختلط للعج والملح فيُه ** رجنا على قوم الشيوخ القديمين
يوم إشتبك عج الرمك في عشيه ** وتطابحوا خلف الركايب إمتبارين
شيوخ الصخا صبابة الشاذليه ** أيضاً وإلى جات الفعايل مديحين
ما أذمهم والله رقيبن عليه ** معين الله والخلايق معيين
والخيل نركبها الحزوم اللفيه ** راحت بفرسان الحمايل مطيعين
وإخوان نوره شافو المكرهيه ** راحن بهم قحص سواة الشياهين
طاح العشا للذيابه الجفشريه ** وحنا لسرفات الضرايا مضرين
بأكل العصيب وياجدن البغيه ** ليا جا المقاضا عند طلابة الدين
والجيش رديناه رد الرعيه ** ما راح لو فوقه رماة فواتين
خلوا زبون الجالس العدمليه ** قاسم عقيد قطعان بدوٍ منيسين
وخلف ربيع الضيف والأهليه ** عيد القوايا اللي على الزاد شفقين
خلوه يوم الملح ينقاد فيه ** وأرخوا جلامدها من الدو مقفين
ما والموا للعزوه العبدليه ** هابلهم اليوم الذي من ورى تين
وش علم ناهس ما إلتفت في خويه ** هو يحسب اللقوات شل البعارين
جتهم إقصصها كلها بالسويه ** والخيل مجنونه وأهلها مجانين
ياليت متعب شاف هاكا العشيه ** ليته حضرنا شاف ما شافت العين
يوم أقبلوا مثل الورود الضميه ** وإلا يشادون الحجيج الملبين
هذا صويب وذا تشله دميه ** وهذا طريح وذا يسوابه الزين
رديتهم بالمنع فرضٍ عليه ** والله يخون اللي يخون لمنيعين
وأنا أحمد اللي زين الهرج ليه ** من غير تدبيره ما حنا مسوين
توضيح المعاني
1/ العدمليه / الذلول الأصيله .
2/ الونيه /، الضعيفه.
3/خربة القين / معيبة اليد أو الرجل من الخيل مما يشل حركتها .
4/ ضيف الله / هو ضيف الله بن عقاب الذويبي من مشاهير قبيلة حرب .
5/ إخوان نوره / عزوة الذوبه من حرب .
6/ الجفشريه / هضبه حمراء تقع أشفل شعب العسيبيات شرق الجرير
وغرب شمال من بلدة عفيف .
7/ العصيب / شحم البطن .
8/ قاسم / قاسم بن براك شيخ الرشايده .
9/ خلف / خلف بن ناهل من زعماء وفرسان قبيلة حرب وأشتهر بكرمه .
10/ ناهس / ناهس الذويبي من شيوخ قبيلة حرب .
11/ متعب / هو الشيخ متعب بن جبرين من أشهر شيوخ بني عبدالله من مطير .
وأرجو ان تنال على اعجابكم واستودعكم الله
عيسى بن عبدالله المطيري